Nampenin Surat Edaran (SE) Gubernur Bali Nomor 9 Tahun 2025 parindikan Gerakan Bali Bersih Sampah, gubernur Bali Wayan Koster ngalarang parum ajak para produsen tur distributor yeh inem nganggon kemasan ane len raosne air minum dalam kemasan (AMDK) di Bali. 

Parume ento mligbagang Percepatan Pelarangan Produksi,Distribusi, tur Penggunaan Plastik Sekali Pakai, rumasuk mase inem-ineman kemasan plastik, ane kagelarang di Gedung Kertha Sabha, Jaya Sabha, Denpasar, dugas Anggara (10/6). 

Di parume ento, gubernur Koster negesang panepas pawigunan tur pangalimbak inem-ineman kemasan plastik betenan teken aliter di Bali. 

Awig-awige ene manut buka dane patut kalaksanayang paling kasepne Desember 2025, kanti ngawit warsa 2026 tusing ada buin AMDK di beten aliter ane kaadep di Bali. 

“Tiang suba tusing nyak kompromi teken parindikan buka kene, tiang dot ngupapira palemahan bali ane pikobet laluhune suba nyasan ngae sebet,” teges Gubernur Koster. 

Dane mase ngararisang produsen nyalanang bisnis AMDK dibeten aliter, yen suba nganggon kemasan ramah lingkungan tur tusing nganggo kahanan plastik. 

Lenan teken di wawidangan distributor, pawungune ene kamargiang mase di wawidangan adat. Gubernur Koster mase negesang yening para Bendesa Adat tusing kabaang ngadokang AMDK di beten aliter rikala ada pamargin upakara adat. Yening tusing ngalaksanayang, lakar kena danda ane gede. 

“Nepek yen ada upakara agama dadi nganggon tumbler keto mase gelas ane tusing uli plastik, untengne bedikin nganggon plastik,” baosne. 

Produsen tur distributor ane impas sasubane Desember 2025, lakar kena danda marupa Surat Peringatan kanti panyabutan izin usaha. 

Gubernur uli Desa Sembiran, Buleleng ene mase nyobyahang yening kebijakane ento maan apresiasi uli Kementrian Lingkungan Hidup dan Kehutanan. Buinne, Bali mase lakar karencanayang dadianga pilot project nasional ane tatuekne nguangin plastik ane maanggon acepok. 

“Bali lakar dadianga Pilot Project, yening ene sida kalaksanayang dadinne lakar mase tuutanga di nasional,” pawewehne. 

Gubernur Koster mase optimis program ene lakar maan panampen ane luung uli wisatawan ane uli pidan stata ngaptiang Bali ane kedas tur tusing ada laluhu plastik. 

“Mara kapesuang dogen awig-awige ene suba maan apresiasi tur panekan wisatawanne mase nincap. Ene muktiang wisatawan ngaptiang Bali ane resik. Dadinne makejang jani patut ngremba,” baosne. 

Di parume ento, para produsen tur distributor di Bali ngorahang sayaga lakar nyokong kebijakane ene. Produsen ngorahang sayaga lakar nganutin awig-awige ene, sambilanga ngidih galah apang sida nelahang stok AMDK di beten aliter. 

Lenan teken ento, para Distributor ngorahang pada sayaga nyokong programe ene. Ane nyada mall di Bali mase ngorahang yening suba ada makudang-kudang tongos mablanja di Bali ane suba ngawitin ngalaksanayang aturane ento. 

“Untengne yen mula produsen tusing nyuplai kemasan di beten aliter tiang ajak makejang mase tusing lakar ngadep” teges panyada mall Living World. 

Nampenin paundukane ento, gubernur Bali buin negesang yening pemerintah lakar ngamaang galah kanti Desember 2025 anggon nelahang stok ane ada. Sabilang sasih pihakne lakar ngadaang evaluasi produksi ngawit uli asasih ane lakar teka.