DPRD Bali Sayagayang Draf Ngalegalang Tajen
bbn/dok beritabali/DPRD Bali Sayagayang Draf Ngalegalang Tajen
bbn/dok beritabali/DPRD Bali Sayagayang Draf Ngalegalang Tajen
GOOGLE NEWS
BERITABALI.COM, BANGLI.
Paundukan ricem di wawidangan tajen ane kanti ngae mati silih tunggil krama di Desa Songan, Kintamani, Bangli, buin nudutin pangurati makudang-kudang pihak.
Kapolda Bali Irjen Pol Daniel Adityajaya negesang suba ngorahin jajaranne apang nyelehin ke tongos paundukane ento ane sibarengan mase ngalaksanayang pidabdab panyelehan yening kabakatang ada panepas hukum.
“Tiang suba ngorahin jajarane apang nyelehin ke TKP tur ngalaksanayang panyelehan yening ada panepas hukum,” baos Kapolda Bali, Irjen Pol Daniel Adityajaya, Redite (15/6/2025) rikala kakonfirmasi di Buleleng rikala pidabdab Udayana Run ke-68.
Di widang ane len, Wakil Ketua DPRD Provinsi Bali Ida Gede Komang Kresna Budi nyobyahang pihakne suba ngae draf regulasi ane kaanggon ngalegalang tajen di Bali. Draf ento ngawit kabligbagang dugase duang sasih ane suba liwat tur aminggu ene pabligbaganne kapepesang.
“Paundukan tajen magetih ene, eda kanti buin ada krana ento patut kabantangin ban aturan tur guru wisesane patut teka di tengahne krana malarapan ban legalitas tabuh rah ene lakar sida ngaba panincapan pamikolih,” teges Kresna Budi.
Dane ngawewehin, amoneanne ene tajen ketah san kalaksanayang tur kapungkah yadian di awig-awig toden kalegalang. Malarapan ban regulasi ane janten, kaaptiang pidabdab tradisi ento sida majalan trepti tur sida marengin pamikolih daerah.
“Krana ajaniane ene ngenahne dogen katombangang nanging enu begeh pesan disisian ane ngalaksanayang tur tusing buin maengkeb-engkeban. Ento ane ngawinang patut kagaenang perda tur regulasi apang tusing ada kasus ane buka keto tur wawidangane sida maan pikolih.” pangalanturne.
Pangrencananne awig-awig tajen ene mase lakar dadi panampen paundukan magetih di wawidangan tajen ane ngae mati adiri kramane tur natuin dadua ane lianan.
Editor: Putu Ayu Candra Dewi
Reporter: bbn/tim
Iklan Sponsor
Iklan Sponsor
Iklan Sponsor
Iklan Sponsor